Anekdoten

 

Die neichi Hous

 

 

Da Samlve(i)da hot a neichi Housn braocht, und wia’s ba uns gwe(i)n is,Göld hom’s kuans ghobt, dou hot’s ghoaßn wann die Keaschtn zeiti sein kriagst a neichi Housn.Wia’s sou weit is gwe(i)n hom’s in da Kouglhuidwoat Keaschtn großt.Und wia’s in Koaw vull hom ghobt,is da Samlve(i)da mit’n Koaw am Buckl,iwa d’Hoad af Ednburg die Keaschtn vakafm.Er hot’s guit vakaft,und is dann gleih af die Groumrumd zan Judn und hot si a neichi deitschi Housn kaft.Er hot’s gleih angle(i)gt und is iwa d’Hoad ausigmaschiart. Za olln Unglick hot’n a Re(i)gn dawischt,a soa richti Woscha,bis af d'Haut is a noß gwe(i)n.

„Ach,Hot a si denkt“ hiaz is eh ollas egal.Und er is weita, is langsam huam. Bis a huam is kamma woara scha wieda trucka.Dahuam hom die Miarlmuahm und da Michlve(i)da scha gwoat, sei sein neigieri gwe(i)n af die neichi Housn.Wia da Samlve(i)da die Tia aufmocht und einigeht,sogt da Michlve(i)da: „Schau den oltn Noan an in  sein Olta kaft a si a Kniahousn.” Schaut da Samlve(i)da, hiaz is de(i) Housn doach den Re(i)gn einganga bis af die Knia.A neichi hot a si nit wieda kafm kinna, hiaz is holt a mit der Kniahousn umananda ganga.

A poa To spä(i)ta kimmt da Michlve(i)da ummi in d’Feia, mocht die Tia auf, steht da Samlve(i)da hinta da Tia.Sogt da Michlve(i)da: Ei, Saml, wous is den los? wou’s gehst den nit fiara? Sogt da Samlve(i)da: I kann jo nit i bin jo nockat.Nan wiasou,wou’s host denn? Sogt da Samlve(i)da: Stöll da voa, bin i heint in Sunnaberi draußn dawischt mi wieda a Re(i)gn.Hiaz schau mi an, sogt a,hiaz is de(i) Housn einganga, nia da Riam und die Schlingl sein nao vahamdn gwe(i)n.

 

 

 

 

Die Hexn

 

 

In unsan Nochboaort in Kolnhof,sein lauta Krowodn bliebm, und de(i) woa’n olli recht Aberglaibisch.

Uaml sein a poa va de(i) Krowodn in Hoaka in Wiatshaus gse(i)ßn, es woa scha spot ba da Nocht. Da Wiat wora Filou,der hot gearn d’Leit vaoarscht, er hot za de(i) Krowodn gsogt: Wanns hiaz huam geht’s und ban Wold voabei kammt’s doat sein Hexn.Hiaz hom die Krowodn nit huam gehgn wölln.Dou hot da Wiat za iahna gsogt i hob a guit’s Mittl, de(i)s hülft gen die Hexn.

Wöllt’s sis hom? Jo hom’s gsogt.

Er hot a kluan’s Fetzl gnamma, is hintari zan Haisl hot an Potzn eini, und hot an Schnulla drauß gmocht.Dann is a wieda fiari und hot iana den Schnulla ge(i)m, und hot gsogt:Wann’s hiaz huam geht’s und ban Wold voabei kammts, dann me(i)ßt’s abwechselnt den Schnulla ins Maul namma und fest zuibeissn, de(i)s hülft bestimmt.

A poa To spä(i)ta sein die Krowodn wieda in Wiatshaus gse(i)ßn, dou hot si da Wiat gfraogt; wia hot enk den mei Mittl ghulfm? Se(i) hom gsogt : Prima hot’s ghulfm, Hexn homa kuani gsehgn, owa dos Mittl hot fuarchtboa graißlich gschme(i)ckt.

Die Treibjogd

 

 

In Hoaka is a Treibjogd gwe(i)n, da Michlve(i)da woa a dabei. In da Zeit wou die Jäga ban jogn woa’n, hot da Michlve(i)da fia olli das Fruihstuck zrecht gmocht.

Er hot a grossi De(i)ck aufbroat und ollas draufgstöllt. A Brot, an Spe(i)ck, a Wuascht und an Wein, und wal er erst voa kuarzn ogstoucha hot, hot a va dahuam a Schissl Graml mit gebraocht und a dabei gstöllt.Wiara ollas sou schaen hergricht hot ghobt und af d’Jäga hot gwoat das zan Fruihstucka kamma, kimmt sei Jogdhumd daher, geht za da Gramlschissl he(i)bt d’Haxn und soacht af die Graml drauf. „Du liawa Gott“ hot a gsogt, wou’s mochi hiaz,de(i) kamma jo gleih zan Fruihstucka.Owa es woa scha zspot d’Jäga sein scha kamma.Se(i) hom olli an großn Hunga ghobt,hom si hinggse(i)tzt und ollas aufge(i)ssn.

Wia’s mit’n E(i)ssn ferti woa’n hot da Michlve(i)da d’ Jäga gfraogt :. „Wia hom enk den die Graml gschme(i)ckt „? Sei hom gsogt :„Guit hom’s gschme(i)ckt, owa a bissl zvül gsolzn seins gwe(i)n

 

 

 

Af’m Hochsitz

 

 

Da Michlve(i)jda is a mul ba da Nocht ausiganga af’m Hochsitz.Da Hochsitz woa ban an Weiat in da näh van Wold.Wiara hinkamma is zan Hochsitz, hot a si denkt wou’s mochi hiaz mit’n Humd,den kann i jo nit aufizahgn af’m Hochsitz.I bindn uafoch intn an hot a si denkt. Weil a kua Strickl hot ghobt hot a den Humd mit’n Träger von Rucksock ba an Weiatstock anbumdn.

Er hot si af’m Hochsitz gse(i)tzt und is ganz ruhig gwe(i)n.Af uaml kimmt a Hiarsch van Wold ausa,er le(i)gt an und wüll grod Schuißn,owa da Humd hot den Hiarschn a scha gsehgn ghobt. Er reißt sie los und rennt mit’n Rucksock hintan Hiarschn her.Da Ähnl hot voa Wut zwoamul hintan Humd hergschoßn.Da Humd hot kuarz aufgheult.

Weil er eh nia de(i) zweng Schuß mitghobt hot,hot a si denkt wou’s sul i dou, i geh hiaz huam. Bis a huam is kamma is scha langsam hell gwoatn.Wiara ban Hof hintn viarakimmt sizt da Humd mit’n Rucksock umman Hols voa da Haustia, mit an gschwulna g’Gsicht.

 

 

 

Kopfweh

 

Es woa mitt’n im Summa,die Katlmuahm is scha togelang mit an Kopftiachl umananda ganga, an soan Einbund hot’s holt ghobt.

Da fraogt da Nochboa den Michlv(i)jda : „Herst Michl, is die Katlmuahm krank“? De(i) rennt jo scha die ganze Zeit mit an Kopftiachl umher.Sogt da Michlve(i)da : „Na,krank is nit,owa Schmolz is goa „

Im Kino

 

 

Da Michlve(i)da und da Hanslve(i)da   sein in Ödenburg einkafm gwe(i)n,und wia’s ferti woa’n hom ‚s a Lust kriagt ins Kino zan gehgn.Se(i) sein hin zan Kino und hom si a Koatn kaft, owa da Fülm is scha glafm,es woa scha finsta drinn.Die Plotzanweisarin hot’s za iarn Plotz hin, se(i) sein in d’Reih eini und hom si nieda.

Wia scha a Zeit um woa hot da Michlve(i)da angfanga zan jamman ,er hot gsogt : „ I kann nit mehr, i holt’s nimma aus, mia brecha scha die Haxn o “ Dou hot da Hanslve(i)da gfraogt : „Wos host, wos jammast dann a sou “? Sogt da Michlve(i)da: „ Stöll da voa,ba mia is jo kua Sitz nit,i hugal jo scha die ganz Zeit “.Sogt da Hanslve(i)da: „Ba mia is jo a kua Sitz nit, i knia jo a scha die ganzi Zeit.

 

 

 

Da Wulf (Hochzeitfreier)

 

 

 

Da Liawl hot die Resl gearn ghobt, er hät’s gearn heiratn wölln. Dou is a zan Michlve(i)da und hot iam bitt er sull fia iam den Wulf mocha.Er sull za da Resl iari Öltan gehgn und fraogn ob a die Resl kriagn kinnt. Guit hot da Michlve(i)da gsogt : Moring am Oubmd geh i hin.

Da Liawl hot aufpasst,und wia da Michlve(i)da am nächst Oubmd hinganga is, is a naochi und hot draußn ban Faensta glauscht. Da Michlve(i)da hot drina sein Sprüchl aufgsogt und hot dann die Öltan gfraogt, ob da Liawl die Resl hom kinnt.Die Öltan woa’n gleih einvastamdn, owa dou hot die Resl va hintn fiara gschrian : „Den mog i nit, der gfollt ma nit “ Wia da Liawl dos draußn gheat hot ,dou hot a ban Faensta einigschrian : „ I mog die eh nit,du bist ma eh vül zu schiach .“

 

 

 

 

Kuarzsichti

 

 

 

Intn af da Holtalocka is a kluans Haus gwe(i)n,mit sou niedrige Faensta, dou hät kinna a Humd einisoa ban Faensta.Und doat is a olts Ehepoa drina bliebm.Die Ahnl hot scha schlecht gsehgn.Die Buiwan wia’s holt sou Moudi is gwe(i)n,hom holt ollwl d’Leit geachat.Und in Summa wia d’Faensta sein ouffmgstamdn, seins hin die Buiwan,und uana hot d ‚Housn oi,und s’Lou ban Faensta einigre(i)ckt. Sogt die Ahnl zan Ähnl   „ Schau nia hin “ es schaut scha wieda a soa großpapata Humd ban Faensta eina.

Fliegeralarm

 

 

Im Herbst 1944 woa olli To Fliegerallarm.Wenn die Sirenen gheult hom is da Michlve(I)da, er woara ängstlicha Mensch,mit’n Bucklkoaw,doat hot a an Spe(i)ck,a Brot und a Flaoschn Wein drinn ghogt,losgrennt.

Hinta iarn Goatn a soa zwoahundat Meter weit woara Kukaruzföld,doat hot a si einigse(i)tzt und vaste(i)ckt. Wenn dann da Alarm wieda voabei woa, is d’ Ahnl hintari und hot aufigschrian :

 „Herst, kannst wieda oakamma es is e  scha ollas voabei .“

 

 

 

Die Darm af’m Maulbeerbam

 

 

 

Wann da Hanslve(i)da gifti woa dou woa sei Ausspruch ollwl :Die Darm wearn gleih hänga af’m Bam.

Uaml hot da Michlve(i)da ogstoucha ghobt,und am nächstn To is die Nochboarin kamma und hot gfraogt :Michl, hot’s kuani Darm mehr übrig, mia hom heint ogstoucha und hiaz homa kuani Darm nit mehr.Sogt da Michlve(i)da :Tuit ma load mia hom kuani Darm mehr, owa geh zan Hanslve(i)da aufi, doat hänga die Darm im Hof af’m Maulbeerbam.

 

 

Das Oltatum

 

 

Da Michlve(i)da is amul in Brumm ganga, Na,und wira doat in Brumm is gwe(i)n, is a Kreiza Jud doat gwe(i)n, der hot Oltatüma gsammlt.Hot a zan Michlve(i)da gsogt : „Herrns haben si keine Altertümer “? Sogt da Michlve(i)da : „Doch mia hom a Oltatum dahuam “ Hot da Jud gsogt : Na und verkaufen sie’s? Na wenig wou’s nit sogt da Michlve(i)da,gänga’s mit aufa af Hoaka.Er hot den Judn af Hoaka aufi zaht. Und wia’s zan Haus sein kamma hot da Jud gsogt : „ Na, wo haben sie das Altertum ?“ Hot da Ähnl gsogt : Augenblick amul,hot die Kuchltia aufgmocht und hot gsogt : „ Doat ban Oufm sitzt “hiaz is die olti Ahnl gwe(i)n.

 

Da Noa

 

 

Da Michlve(i)da hot draußn in da näh va da Grenz za Neckenmarkt an kluan Weiat ghobt, es woa a soa wüldii Soartn va Weinba, in Hoaka homa Noa dazui gsogt.Wal ma den Wein nit nit hot vakafm kinna, hotn  holt da Ve(i)da sölba trunka.

Hintn ban Haus voa da Kölla,mit Stiagn oi. In da Wintazeit is da Ve(i)da ollwl am Oubmd naoch'n e(i)ssn   hintari in Kölla, mit a Keazn  in Kölla und hot si an dreidezi Stuzn vul Wein ghult. Uan bis zweng Stuzn hot a meist gleih hintn trunka,und uan Stuzn vull hot a si imma in d’Stubm mitgnamma.Wann a dann in d’Stubm is  kamma hota scha  a rots Gsicht ghobt, er hotn scha gspüart.

Uaml is a wiedamul hintari zan Wein huln is owa nit gleih zruckkamma,dou hot si d’Muahm denkt ,i muiß hiaz schaun wou a bleibt. Sie geht hintari zan Kölla owa doat is ollas finsta,  sie kimmt näha dou hot si den den Ve(i)da jamman gheat.Er is im Kölla ba d’Fassl gse(i)ßn und woa total blau, er hot die Stiagn nimma aufi kinna.Sie hotn dann mit vül Miah in d’Stubm eini zaht

 

Die Wärmeflaoschn

 

 

Dou is a Hoaka Ve(i)da gwe(i)jn der hot sou fuachtboa Kreizweh ghobt, dou hot die Hausfrau a Hessin, za iam gsogt er sul si a Wärmeflaoschn drauf le(i)gn, denn Wärme hülft.Owa wer hot den domols wiama her sei kamma a Wärmeflaoschn gobt.

Dou hot sei Weib za iam gsogt :Leg die ins Be(i)tt i mochta a Wärmeflaoschn.Sie hot a Flaoschn gnamma hot a hoaß Wossa eini, hot’s zuigstouplt und mit an Handtui umwicklt und hot’s iam af’s Kreiz gle(i)gt.Owa die Flaoschn is zplatzt und er hot si den ganzn Hintan vabrüht.Hiaz hom’ s die Gemeindeschwe(i)sta ghult,die hot si de(i)s angschaut und hot die Hoaka Muahm gfraogt : „Haben sie keinen Puder im Haus“ ? Na, sogt die Hoakamuahm,mia hom nua a Margarine, a Sanella

Am nächstn To is die Schwe(i)sta wieda kamma und hot a Dosn Puder mitbraocht,und hot’n da Hoakamuahm zoagt. „ Och , hot d’Hoakamuahm gsogt, de(i)s kenn i eh,de(i)s is jo a G’stupp.

                                                  

 

 

In da Chirurgisch Klinik

 

Da Samdlmuahm ia Bruida, da Michlve(i)da is in da Chirurgischen Klinik in Marburg gle(i)gn. Die Samdlmuahm hot’n wölln am Summto besucha. Hiaz is am Summtonachmitto mit’ n Zug naoch Marburg gfohn.Wias in Marburg ankamma is und in da großn Bahnhofshalle gstamdn is, hot’s a si denkt wous moch i hiaz, i kenn mi jo in Marburg goanit aus.

Dou is in da Bahnhofshalle a soa ganz voanehma Herr gstamdn, dou hot’s a si gsogt,den fraog i hiaz.Sie is hin ganga za iam und hot ganz voanehm gfraogt : „ Bittschön mein Herr, wo geht es hier in die Zigurifabrik „?

 

 

 

In da Apothe(i)kn

 

 

Die Katlmuahm hot Schmerzn ghobt,ba da Kui ( Kinn ) hot’s ia wehtaon.Hiaz is in die Apothe(i)kn um sich fia die Schmerzn wous zan huln.Wias in die Apothe(i)kn eini kimmt fraogt da Apotheker : „ Liebe Frau was möchten Sie“? O, hot sa si denkt, dou muiß i a voanehm 

spre(i)cha. Dou hot’s gsogt : „Bittschön Herr Apotheker, geben sie mir was für meine Ku.

Sogt da Apotheker : „ Liebe Frau, da kann ich ihnen nicht helfen,da müssen sie zum Tierarzt gehen “.

Ban Grumbiarn ausmocha

 

Mei Ahnl und nao a poa Weiba sein in da friah ausi af’m Grumbiarnaocka um di Grumbiarn aus zanmocha.Da Ähnl und ih sein am Naochmitto naochi gfohn um die Grumbiarn huam zan huln.Da Ähnl woa im Doaf scha bekannt mit seini Kiah,er hot ollwl an Tempo drauf ghobt,dao is kua Roußwaogn nit mitkamma.und de(i)s woara sou.Die uani va dej Kiah de(i) hot si wanns me(i)ßn hot, hintn ollwl a sou zuigsaut,und dos hot den Ähnl ollwl geachat, und er hot dann fuarchtboa gschimpft,und die Kiah sein dann voa Angst g’rennt wia narrisch.

An dem Naochmitto wiama sein ausigfohn, die Grumbiarn zanhuln, es muiß a Montog sein gwe(i)n

Da Ähnl hot a schaens weiß Hammad anghobt.Und wia’s holt olwl a sou passt,die Kuih hot

wiedamul me(i)ßn,und hot den Schwoaf richti vullgmocht,dann hot’s mit’n Schwoaf a poamul uma-

nanda ghaut,und hot den Ähnl vull dawischt.Sein schaens weiß Hammad woa total vasaut.

Die Kiah hom gleih angfanga zan renna,sei hom eh gwißt wou’s hiaz kimmt.Da Ähnl hot fuarchtboa gschimpft Naoch a zwoahundat Meta sein die Kiah wieda lagsama gwoatn, da Ähnl hot si a wieda  beruhigt.Wia sein dann guit am Grumbiarnocka ankamma.

Wia hom dann die Grumbiarn aufglaond, und dann sein ma losgfohn.Ih hob die Kiah voa’n bload die andarn sein hintan Waogn herganga.Und wiama van Aocka. af’m Weg ausi hom wölln.hob ih mi mit die Kiah zu gach einidrat,da Schuba voa’n is hochganga und di Grumbiarn sein ausigrullt.

Es woa’n jo goanit souvül,owa de(i)s woa hiatz egal,da Ähnl is wiara wülda va hintn af mi los,ih hob die Kiah stehgn laoßn und bin foat.Ih hob va weit’n zuigschaut bis fertig woa’n mit’n auf laona Wiari dann gsehgn hob das si da Ähnl wieda beruhigt hot bin ih wieda zruck. Dann sein ma langsam huam gfohn.

 

 

 

Das Kreizaschupfm

 

Dou’s Kreizaschupfm woara Spül, de(i)s hom mia Buiwan im Summa af da Gaossn g’spült.

Es hom mehrari Buiwan mitspüln kinna, man hot dazui olti Münz’n braocht.

Es wuarde draußn af da Gaossn a cirka 2 Meta broata Strich zougn, und die Buiwa hom si

3 Meta van Strich aufgstöllt.Dann hot jeda Buiw da Reihe naoch mit a Münz’n schupfm deaf’m. Und wea mit seina Münz’n dem Strich am nächst’n woa, dea hot g’wunna,und olli Münz’n va di andarn Buiwan hom iahm g’heat.

Ich hob ollwl di schaenst’n Münz’n ghobt.Wal mei Ähnl da Mesna woa, hob ih gwist das in da Sakristei in an soan olt’n Kaostn ,a kluan’s Sackal mit olti Münz’n woa, voa’n east’n ‚Wöltkriag

her.Doat hob a mia ollwl meini Münz’n g'hult.

Beim Bodawiat

 

 

A soa 2 Km va Hoaka,mittn in d´Weiatn direkt an da Grenz za Neckenmarkt, am Hausberi ,dou woa da Bodawiat.Es wora kluans Wiatshaus owa da Treffpunkt fia die ganzi Umgebung.

Im Summa woa doat olli Summto Tanz, ba schaena We(i)tta is draußnt tanzt woa´n.Doat woa a kluana Tanzplotz,und rundherum inta die Oubstbama woa´n Tisch und Bänk doat sein d´Leit gse(i)ßn.Zwoa Mann hom die Musi gmocht.Es sein ollwl vül Leit kamma, va Hoaka,va Ödnburg,und va üba da Grenz aus Deutschkreutz,Haschendorf und Neckenmarkt.De(i)s woa a wundaboas Platzl,ba schaena We(i)tta hot ma kinna bis zan Neusiedlersee ummi sehgn.

Wia Buim sein a olli Summto aufi zan Bodawiat.Wann im Mai die Maiglaigal bliat hom sein ma in Wold und hom an Buschn Maiglaigal graoßt,und hom´s dann den Stodtleit vakaft.Fia an soa´n Buschn Maiglaigal  homa 20 Heller kriagt,dafia homa uns ban Bodawiat a Wuaschtbrot und a Limonade kaft.

Manchmul hom mia Buim wann olli ban Tanzn woa´n,den Leit va die Tisch den Wein austrunka,wanns dann van Tanzn zruckkamma sein woa´n iari Glasl laa.

Dou homa scha aufpassn me(i)ßn das uns kuana dawischt,den dou hät´s bestimmt a poa Watschn ge(i)m.

 

 

 

 

Ban Sauabrumm

 

Wia Hoakaer hom unsa Trinkwossa va drüba da Grenz va Deutschkreutz ghult.Da Sauabrumm woara Mineralwossaquölln und etwa 2 Km va Hoaka entfernt.

Wia Buim sein a poamul in da Wocha,im Summa olli To zan Brumm um unsa

Trinkwossa zan huln.Wia sein ollwl mit mehreren zammaganga.de(i)s woa lustiga,Mia hom uns an Rucksock gnamma,und a poa Flaoschn eini taon,oda 2 ,Bluza,de(i9 homa zsamma bumndn,und uan voan af da Brust,und den andarn am

Bugl traogn, asou sein ma losgmaschiart..Ba da Grenzwach homa an Ausweis ‚Brummzejttl’ braocht,dann homa kinna passiarn.Meistn´s sein ma owa schwoarz üba die Grenz,denn de(i)s woa fia uns vül näha.Und die Grenza hom si eh nit drumm gscheat.

Wann ma dann ban Brumm woa´n,homa east unsari Flaoschn und Bluza vull gmocht,und danao va den guitn Sauawossa trunka,denn frisch va da Quölln hot´s am be(i)(i)tn gschmejckt.

Manchmul woa´n a Deutschkreutzer Buim ban Brumm,dou is scha amul grauft woa´n,und Flaoschn oda Bluza sein kaputt ganga.De(i)s woa dann scha sehr schlimm,denn Flaoschn und Bluza woa´n ba uns schwa zan kriagn.

Wiama nou dahuam in Hoaka woa’n  hom die oltn Leit ollwl gsogt,anni den Sauawossa kinnt ma nit le(i)bm,hiaz sein ma scha 65 Joah va dahuam foat und mial Le(ib)m na ollwl.Owa wann ma af Deutschkreutz kamma,is unsa easta Weg ollwl zan Sauabrumm.

 

 

 

Da Bräutigam

Da Motz hot sou grossi Oarwaschhl ghobt, Uaml ba da Nocht hom die Buiwan ban Michlve(i)da am Faensta klopft,und hom eini grufm: „ Michlve(i)da , da Motz mecht gearn enka Tochta hom“.Da Michlve(i)da woa gifti walsn van Schlaof aufgwe(i)ckt hom er ho’s Faensta aufgmocht und er hot za die Buiwan ausigschrian: „Schneid’s den Bräutigam die Oarwaschl o,und suid’s enk a Sulz.

 

Da Jost

Er hot Saml ghoaßn,owa olli im Doaf hom Jost zan iam gsogt.Er woara großa Filou, er hot gearn d’Leit vaoarscht.Am liabstn seine Frau,die Miarl.Dou seins amul ba da Nocht im Be(i)tt gle(i)gn,und dou hot die Miarl gsogt : „Heast, Saml, wöllma nit aufstehgn und ausigehgn und den schaena Vollmond anschaun Sogt da Jost : „ Miarl,weng wos sull ma den hiaz aufstehgn und ausigehgn wia schaugn moring in da friah,dou is hell und wia sehgn ollas vül be(i)ssa“.

 

Voa Gericht

Wou da Michlve(i)da bliebm is, woa hintan Goatn a Boch,doat woan Raotzn drinn.Er hot a Le(i)geisn aufgstöllt um die Raotzn zan fanga, owa er hot den Nochboan sei Kaotz gfanga.Da Nochboa hot de(i)s gsehgn, hot de(i)s Le(i)geisn zan Büagamoaste braocht und hot a Anzeige gmochtA poa To spe(i)ta steh i voan Haus, kimmt da Michlve(i)da daher, er woa ganz aufgre(i)gt. I hob iam gfraogt „ Michlve(i)da wou wüllst dann hinn „?Er sogt i bin zan Büagamoasta bstöllt i muiß voa’s G’richt. Wenig wous, hob i gfaogt ? Er sogt : I hob den Nochboan sei Kaotz gfanga und der hot mi beim Büagamoasta anzeigt.I hob dann gwoat bis a wieda zruck kimmt.Af uaml is a scha kamma,das Le(i)geisn hot a untan Oarm ghobt, und pfiffm hot a, er woa ganz erleichtert.I hob iam gfraogt: Michlve(i)da wia is den ausganga ? Er hot gsogt „ Alles gut gelaufen, keine Strafe.

 

Die Radltour

Da Liawlve(i)da und d’Samdlmuahm sein amul mit’n Radl in an Summto ins Nachboadoaf af Besuch gfohn,af uan Radl seins gfohn.Da Liawlve(i)da hot tre(i)tn, und die Samdlmuahm is hintn af’m Pakltroa gse(i)ßn und hot af ua Seitn die Fiaß oihänga laoßn.Domols woa nit souvül Verkehr wia heint, es woa gleih wiama dou herkamma sein Wias a sou gmiatlich dahinn gfohn sein, se(i) hom si guit untaholtn, kimmt a Polizist mit an Motoradl daher.Er is langsam ne(i)bm se(i) hergfohn,und hot d’Samdlmuahm ollwl angschaut, de(i) hot si owa nit weita gstört.sie hot’na angschaut Wias a Stickl nebnananda gfohn sein sogt da Polizist za da Samdlmuahm „Woll'n sie nicht absteigen,das ist ja allerhand zwei so alte Leute auf einen Fahrrad „Sogt die Samdlmuahm za iam „ Se(i) hom jo nix gsogt „Da Liawlve(i)da is ollwl weitagfohn,der hot de(i)s goanit mitkriagt.dou hot iam die Samdlmuahm af’m Buckl klopft,und hot gschrian „Bleib stehgn,die Polizei is dou, mia me(i)ßn osteign „.